中文
 
   
 
 
 
 

【天水圍飛馬 4:2 標準流浪 】

2020/11/08
 
 

飛馬今場有三個新兵正選上陣,分別係「小志強」方栢倫同埋兩個巴西外援 — 中堅古安奴同前鋒山度士。 開賽僅7分鐘,孫銘謙開出角球,助攻嘅古安奴混戰下狂抽入網,為飛馬先開紀錄。12分鐘,另一個新兵方栢倫左路起腳省中對手高出。角球由孫銘謙開出,劉學銘衝頂被李溢晉托出底線;第二次角球,山度士攻門被對方後衛閂出底線;第三次角球就入波喇!古安奴接應衝頂入網,個人梅開二度!飛馬喺29分鐘再度擴大比分,羅振庭右路傳中,方栢倫被對手力壓下篤前,山度士門前射入,兩個巴西新兵齊齊開齋,為飛馬上半場領先3比0! 李藹軒下半場入替山度士後表現活躍,先後有頭槌以及遠射機會可惜無功而還。飛馬之後換入另外兩名巴西外援 — 班拿度同達施華。球隊喺67分鐘被流浪攻入一球之後,81分鐘就有新加盟嘅達施華直線交比吳文希,「文希」起腳慢溜尾袋入網,攻入佢職業生涯第一個入球!球隊之後雖然被基藍馬頂入,最終都以4比2贏波! 今場四個外援都獲得上陣機會,暫代主教練文彼得表示滿意佢地嘅表現:「今場四個外援把握菁英盃嘅機會熱身,準備聯賽。今場睇到佢地嘅能力,只係需要時間提升狀態。」 「文希」笑言今場入球係最好嘅生日禮物:「感覺好開心,最近幾場菁英盃因為外援仲要時間準備,有唔少上陣機會,希望呢個入球可以鼓勵自己喺聯賽爭取上陣時間!」

#菁英盃 #飛馬賽前 #TSWPegasus #天水圍飛馬足球隊 #tswpfc #WeSucceedTogether

 
索引
最新消息
新聞稿
 
 
合作夥伴
Copyright ©TSW Pegasus FC Limited. All rights reserved. 版權所有 不得轉載。 使用條款 designed by Stanley C